اللهم لاشمــاته

في عطله الصيف الأخيره تقابلت مع عدد كبير من شيبان الديره الذين حرصوا كل يوم من ايام الصيف على الحضور المبكر (الساعه الخامسه صباحا) الى قهوه خلوفه لتناول الفطور. وبعد ايام عديده من النقاش على السر وراء حضورهم لتناول الفطور في قهوه خلوفه اتضح لي ان الشيبان مساكين مالهم حيله .... كهيلهم تعلمن ماعدن يقمن إلا ظهريه

*********

واحد من جماعه الربع او بلاخص من اللي مايحبون روحه الديره أبد حتى بصيفها خوفا من العين جعلها بالفقع براسه. ماعلينا جتنا أخبار اكيده من وكاله(يقولون) إن الحقير هذا رفض وبطل من فكره الزواج بعد أن علم ان قهوه أم العروس بخمسه الآف ريال. ومن مصادر موثوقه علمنا أن رده فعله كانت مش أوي وأنه قال : خمسه الآف تجيب خمسين شيشه. عشان كذا قرر يفتح قهوه ويسميها : قهوه مــــعــــــاند.
خمسين شيشه .... يتربون بعزك يامــــعــــــاند

*********

ماادري إذا لاحظتم ظاهره الحواشي أو ممكن نسميها موضه الحواشي اللي انتشرت بالصيف. والله تقول ماحد شاف خير ابد أو الظاهر إن الناس خلاص ماعاد لهم بالمفاطيح . ماودي اكشخ عليكم واقول إن ماكان لي خاطر بالقعود والله يكثر النعمه بل بالعكس كانت أمنيه إني اجرب لحم القعود بس الوضع ابد ماساعد. الناس كانوا متخارشين على النعمه ومتخاشرين الأماكن على الصحون والواسطه كان لها دور. بعض الصغار نسوا مسأله العمر بعد ماشافوا القعود .. بيني وبينكم الشكل يحمس . صحون المفاطيح ماعليها أحد والهنود اللي فرشوا السفر ماصدقوا عيونهم وقالوا ايش الشعب السعودي المثقف كل هذا عشان يتجنبون الاصابه بحمى الوادي المتصدع.... مسكين يابو فسيه حسبت الحاشي نعيمي .

في الزحمه طلعت بهذي الخاطره

الجمـــــاعه .. قيام ..قعود ..... نظراتهم توجهت لضيفنا الموعود ... ابن جمل يسمونه .. قعود

المفاطيح من رهبه الضيف العزيز .. تقوم .. وتطيح وفي داخلها تقول كلوه.....مصيرنا للدود

وياحسافه حتى ذواقه ماحصلنا عليها